கிருஷ்ணன் எப்படி வின்செண்ட் ஆக முடியும்!!!

எல்லாரும் பார்த்த தசாவதாரம் நானும் பார்த்தாயிற்று. (அய்யனாரின் எச்சரிக்கையையும் மீறி). தீவிர வைணவர்கள் படத்தின் ஆரம்பக்காட்சிகளில் கொஞ்சம் உணர்ச்சிவசப்பட நேரிடலாம். ஆனாலும் இரங்கராஜ நம்பி மேல் பரிதாபம் ஒன்றும் பெரிதாக ஏற்படவில்லை. ஏனென்றால் அவரும் அரசரைப்போலவே, மத வெறியனாகத்தான் சித்தரிக்கப்படுகிறார். ஐந்தெழுத்து-எட்டெழுத்து எல்லாம் ஒன்றே என்று நம்புபவராக சித்தரிக்கப்படவில்லை. அதனால் அரசனுக்கு இருப்பது போல் அதிகாரம் இவரிடம் இருந்தால் ரங்கராஜ நம்பியும் இப்படித்தான் செய்திருப்பார் என்றே தோன்றுகிறது.


தசாவதாரம் படத்தில் வரும் ஒவ்வொரு பாத்திரங்களும், தசாவதாரத்தின் ஒவ்வொரு அவதாரத்தையும் மனதில் கொண்டு கமல் உருவாக்கியிருக்கிறார்.
1. மச்சாவதாரம் - இரங்கராஜ நம்பி

மச்சாவதாரம் தான் தசாவதாரங்களில் முதல். ரங்கராஜ நம்பியும் படத்தின் முதல் அவதாரம்.


2. பலராம அவதாரம் - பல்ராம் நாயுடு



பேரே சொல்லிவிடுகிறது என்ன தொடர்பு என்று.



3. கிருஷ்ணாவதாரம் - வின்செண்ட் பூவராகன்


கிருஷ்ணரைப்போலவே இவரும் தலித்தாக மட்டும் இல்லை - கருப்பாகவும் இருக்கிறார். கிருஷ்ணன், திரவுபதியின் மானம் காப்பது போல், படத்தில் வின்செண்ட் ஆண்டாள் மானத்தை(மணல் அள்ளும் இடத்தில்) காப்பாற்றுகிறார். கிருஷ்ணர் அம்பு குத்தி இறப்பது போல், கம்பியால் குத்துபட்டு உயிர் துறக்கிறார். பி. வாசு வரும் காட்சியில் வின்செண்ட் பூவராகனுடம் வருபவர்கள் ஐந்து பேர். அவர்களுக்கு மது கொடுத்து ஏமாற்ற நினைப்பார் பி.வாசு. படத்தில் பலர் மனதைத்தொட்ட கதாபாத்திரம்.



4. வராக அவதாரம் - கிருஷ்ணவேணி பாட்டி


வராக அவதாரத்தில் விஷ்ணு ஆயிரம் ஆண்டுகள் போர்செய்து வென்றார் என்பது ஐதிகம்.முகுந்தா முகுந்தா பாட்டில் கிருஷ்ணவேணி பாட்டி பொம்மலாட்டத்தில், முதலில் வராக அவதாரம் தான் காட்டுவார். படத்திலேயே வயதில் ஆண்டுகள் அதிகம் ஆனவர்.



5. வாமன அவதாரம் - கலிபுல்லா கான்


வாமனர் தான் மாவலியை வெல்ல, விஷ்வரூபம் எடுப்பார்.



6. பரசுராம அவதாரம் - Christian Fletcher


பரசுராமரைப்போலவே சட்டென்று கோபம் வரும். அவரைப்போலவே பல கொலைகள் படத்திலும் செய்வார். பரசுராமர் 21 கொலைகள் செய்தாராம். ப்ளெட்சர் எத்தனை கொலைகள் செய்தார் என்பது தெரியவில்லை. உங்கள் யாருக்காவது எண்ணிக்கை தெரிந்தால் நீங்கள் சொல்லலாம்.


7. நரசிம்ம அவதாரம் - Shingen Narahashi


பேரிலேயே தொடர்பு தெரிகிறதா!!! ஆயுதங்கள் எதுவும் இல்லாமல் கையாலேயே எதிரிகளை தாக்குகிறார் தற்காப்புக்கலையின் மூலம். அதுமட்டுமன்றி நரசிம்ம அவதாரம் பிரகலாதனுக்கு குருவாகவும் இருப்பது போல், ஷிங்கன் மற்றவர்களுக்கு, ஆசிரியராகவும் இருக்கிறார்.



8. ராம அவதாரம் - அவ்தார் சிங்


தன் பாடல் வாழ்க்கை முக்கியமில்லை. மனைவிதான் முக்கியம் என்று மனைவி மேல் வைத்த அன்பினால் ராமருக்கு ஈடாகிறார்.



9. கல்கி அவதாரம் - கோவிந்தராஜ் ராமசாமி



கலியுகத்து நாயகன் = படத்தின் நாயகன். கலியுகத்தில் உலகத்தில் அழிவு ஏற்படும் என்ற நம்பிக்கைக்கு ஏற்ப சுனாமி ஏற்படுகிறது.


10. கூர்மாவதாரம் - புஷ்

திருப்பாற்கடலை அசுரரும் தேவரும் மந்திரமேருவை மத்தாக வைத்துக் கடைகையில் அடியில் பிடிமானத்திற்காகத் திருமால் ஆமை உரு எடுத்து மத்திற்குப் பிடிமானமாக இருந்தார். அமுதத்திற்காகத்தான் தேவர்களுக்கும், அசுரர்களுக்கு சண்டையே வந்த்தது. ஜார்ஜ் புஷ் இந்த மாதிரி நிறைய பேர்களுக்கு சண்டைமூட்டுவதாகவும் கொள்ளலாம். அல்லது ஆமை மாதிரி மந்தமானவர் என்றும் கொள்ளலாம். (நியூக்ளியர் ஆயுதம் பாய்ச்சலாமா என்று ஒரு கேள்வி கேட்பாரே).

------- *************** ---------





போன முறை சிவாஜி பாக்க போனபோது, ஒருத்தரை சந்திச்சேன். அவர் பெரும்பாலும் வடக்கே வாழ்ந்த்தவர். அப்படியே பேச்சு வாக்கில், இப்பெல்லாம் இந்திப்படம் பாக்கறதை விட்டுட்டேன். தமிழ்ப்படங்களே நல்லா இருக்கு அப்படின்னதும் அவருக்கு வந்ததே கோபம். அப்படியெல்லாம் இல்லை. தூம் 2 சூப்பர் அப்படின்னு கொஞ்சம் உணர்ச்சி வசப்பட்டார். அப்பறம் சுதாரித்துக்கொண்டார். நல்லவேளை அவரை தசாவதாரத்தில் பார்க்க நேரிடவில்லை.

டிஸ்கி: இந்த தசாவதாரம் ஒப்புவமைகள் சொந்த சரக்கல்ல.